Departamenti Amerikan i Shtetit ka përsëritur thirrjen drejtuar presidentit serb Vuçiç dhe qeverisë së tij që të lirojë menjëherë 3 policët e Kosovës të ndaluar disa ditë më parë.
Përmes një postimi në rrjetet sociale, zëdhënësi Matthew Miller shkruan se arrestimi dhe ndalimi i tyre me akuza të rreme, ka përkeqësuar situatën tashmë të tensionuar.
“I bëjmë thirrje presidentit Vuçiç dhe qeverisë së Serbisë që menjëherë dhe pa kushte të lirojnë tre policët e Kosovës të arrestuar më 14 qershor. Arrestimi dhe ndalimi i tyre me akuza të rreme ka përkeqësuar një situatë tashmë të tensionuar. Ne gjithashtu vazhdojmë t’i bëjmë thirrje Serbisë dhe Kosovës që të ndjekin planin e BE-ja dhe të kthehen pa vonesë në dialogun e lehtësuar nga BE-ja”, shkruhet në reagim.
Për këtë çështje reagoi dhe përfaqësuesja e PE për Kosovën, Viola Von Cramon, e cila ripostoi reagimin e Departamentit të Shtetit, duke komentuar mbi të “Më në fund”.
