Merr një tjetër rrjedhë dosja e Safet Gjicit. Avokatja e gruas me inicialet A.K. 40-vjeçe ka nxjerrë një tjetër version.
Kemi të paktën 3 versione kontradiktore. Gjici fillimisht ka pretenduar për sulm politik. Më pas tha se ka pasur raport intim të gjatë me 40-vjeçaren. Dje gruaja gjithashtu pranoi se ka pasur lidhje me Safet Gjicin. Por sot avokatja e hodhi poshtë këtë pistë.
Natasha Velia tha se qëllimi i videos ishte për ta demaskuar kryetarin e bashkisë që dha dorëheqjen pas skandalit.
“A. K. dhe Safet Gjici nuk kishin asnjë lidhje. Ajo ishte e vetëdijshme për të kryer një inskenim, për ta demaskuar këtë zyrtar shtetëror. Ata njiheshin në mënyrë sipërfaqësore. Aktin seksual e ka kryer për ta demaskuar Gjicin.
Unë nuk jam e autorizuar të nxjerr punën e saj. Ajo ka punuar në natyrën e saj investigative, ka kryer këtë funksion, duke demaskuar personalitete të tilla në administratën shtetërore. Ajo ka demaskuar dhe personazhe të tjerë. Ajo nuk ka dashur që video të bëhet virale, ndodhi aksidentalisht.
Sa i përket projektit, u përdor që të bëhej më i besueshëm roli i saj. Projekti ekziston, por nuk ishte objekt për t’u bërë tender, për t’u realizuar”, tha avokatja.
