Shoqata Down Syndrome Kosova për mes një postimi në Facebook ka njoftuar për një rast dhune fizike ndaj një fëmije me sindromën Down.
Sipas Shoqatës një përfaqësues i qendrës “OPFAKOS” në Pejë me inicialet I.B ka ushtuar dhunë ndaj një fëmije me sindromën Down në plazhin e Velipojës. Rasti u regjistrua më 6 korrik.
“Të shqetësuar ju njoftojmë se përmes medias sociale, Facebook kemi pranuar raport dhune ndaj një fëmije me sindromën Down të ushtruar nga përfaqësuesi i qendrës së OPFAKOS në Pejë, me inicialet I.B, në praninë e stafit të OJQ-së në fjalë dhe pjesëmarrësve të tjerë.
Dëshmitari i pranishëm M.M (i gatshëm të dëshmoj para organeve kompetente) raportoj se me datë 6 korrik 2023 në hapësirë publike, plazh në Velipojë, Republika e Shqipërisë, i lartë cekuri ka ushtruar dhunë fizike dhe më pas e ka hedhur në ujë fëmijën duke ia rrezikuar jetën”, thuhet në njoftimin e DSK-së.
DSK thekson se kanë kontaktuar prindin e fëmijës i cili e ka konfirmuar që personi në fjalë ka ushtruar dhunë ndaj fëmijës së tij, por për arsye të panjohura nuk ka pranuar të denoncoj rastin.
“DSK dhe komuniteti i personave me sindromën Down dënon ashpër veprën e kryer nga z.I.B si dhe i bëjmë thirrje të gjitha organeve ligj zbatuese që rasti në fjalë të trajtohet në mënyrë të drejtë dhe profesionale”, thuhet në reagimin e shoqatës.