Ish-kryeminsitri, Sali Berisha për mes një postimi në llogarinë e tij në Facebook ka reaguar në lidhje me 28-vjetorin e gjenocidit serb në Srebrenicë.
Në postimin e tij Berisha shkruan se 28 vite më parë falangat serbe të komanduara nga kasapët e Bosnjës kryen masakrën më të madhe pas Luftës së Dytë Botërore në Europë.
Më tej Berisha shprehu ngushëllimet për familjarët e 8372 personave të cilët mbetën viktimë ku dënoi aktin e tmerrshëm të serbëve në Srebrenicë.
Postimi i plotë i Berishës
Sot 28-vjetori i genocidit serb në Srebrenicë.
Miq, sot 28 vjet me parë, falangat serbe të komanduara nga kasapët e Bosnjës, Ratko Mlladiç dhe Radovan Karaxhiç, si dhe paramilitarët e Ministrisë së Brendshme të Beogradit, të urdhëruara direkt nga Sllobodan Millosheviç, kryen aktin më makabër, genocidin e Srebrenicës, masakrën më të madhe pas Luftës së Dytë Botërore në Europë.
Ata, në një kasaphanë të vërtetë, ekzekutuan në Srebrenicë 8372 burra, gra e fëmijë boshnjak të besimit mysliman, të paarmatosur, të grumbulluar aty nën mbrojtjen e trupave të OKB. Në këtë përvjetor, duke u përulur me pikëllim të thellë para kujtimit të viktimave të pafajshëm të këtij genocidi, shpreh ngushëllimet e mia më të ndjera familjeve të tyre dhe dënoj me ashpërsinë më të madhe këtë barbari të tmerrshme të serbëve në Srebrenicë.
Por sot shtoj gjithashtu se shqiptarët janë të parët dhe të fundit në rajon që përjetuan genocidin ciklik dhe barbarinë serbe në rajon që nga gjysma e dytë e shekullit të 19-të deri në vitin 1999 me operacionin “Patkoi” në Kosovë.
Njohja dhe dënimi nga Beogradi zyrtar i genocidit të tij ciklik, ndaj kombeve të rajonit boshnjakëve, shqiptarëve është kusht madhor për paqen dhe stabilitetin në rajon.
