Byroja Kombëtare e Hetimit ose “FBI-ja shqiptare” është vendosur në lëvizje pasi Gjykata e Posaçme kundër Korrupsionit dhe Krimit të Organizuar ka firmosur disa urdhër-kontrolle në kuadër të hetimit që po zhvillohet ndaj ish-zv/Kryeministrit Arben Ahmetaj për inceneratorët.
Agjentët e BKH-së po ushtrojnë kontroll në disa ambiente. Ndër vendet që po kontrollohen është edhe shtëpia në Lalëz e të atit të Erjola Hoxhës, partneres së Arben Ahmetajt.
Po kështu janë duke u kontrolluar edhe ambiente të tjera. Arben Ahmetajt i është hequr nga Parlamenti imuniteti i deputetit, duke i hapur rrugë firmosjes së kontrolleve dhe kërkesës për arrestim nga SPAK.
Por ende nuk ka informacion nëse nga GJKKO është firmosur urdhri për arrestimin e Ahmetajt. Deputeti socialist nuk ndodhet në Shqipëri prej disa ditësh.
Avokati Henrik Ligori pak ditë më parë, konkretisht të premten e kaluar deklaroi që Ahmetaj ndodhet në Britani të Madhe.
SPAK e akuzon Arben Ahmetajn për 3 akuza në lidhje me inceneratorët për korrupsion pasiv, fshehje të pasurisë dhe pastrim parash.
Hetimi ndaj Ahmetajt, BKH “zapton” shtëpinë e babait të bashkëjetueses së tij
