Një vatër zjarri është riaktivizuar që ditën e djeshme në pyllin me pisha në Peshtan të Fierit. Flakët kanë dalë jashtë kontrollit dhe po përhapen drejt fshatit Kraps teksa zjarrfikëset po punojnë për shuarjen.
Prefektit i qarkut Fier, Lefter Shehaj tha se kanë bërë kërkesë për ndërhyrje nga ajri. Helikopteri “Cougar” i Ministrisë së Mbrojtjes ka mbërritur në ndihmë të forcave zjarrfikëse për shuarjen e flakëve në zonën e pyllëzuar në Peshtan.
Më herët një 28-vjeçar, banor i fshatit Peshtan është vënë në pranga pasi dyshohet se ndezi zjarrin për të hapur kullota të reja por flakët dolën jashtë kontrollit duke shkaktuar dëme të mëdha në sipërfaqen pyjore.
Një sipërfaqe prej 25 hektarësh me pisha, dushk, shkurre dhe ullishte janë shkrumbuar si pasojë e zjarrit.
