Sipas një njoftimi në faqen zyrtare të grupit, Randy Meisner, i cili ishte bashkëthemelues i grupit legjendar të rock-ut “Eagles” ka vdekur në moshën 77-vjeçare, shkruan CNN.
“The Eagles janë të pikëlluar të raportojnë se anëtari themelues, basisti dhe vokalisti, Randy Meisner, ndërroi jetë në Los Angeles në moshën 77-vjeçare, për shkak të komplikimeve nga sëmundja kronike obstruktive pulmonare (COPD)”, thuhet në deklaratë.
“Randy ishte një pjesë integrale e “Eagles” dhe kishte një rol të rëndësishëm në suksesin e hershëm të grupit. Gama e tij vokale ishte befasuese, siç është evidente në baladën e tij të njohur, ‘Take It to the Limit’”, thanë “Eagles”.
Karriera muzikore e Meisner filloi me Stone Canyon Band të Rick Nelson si vokalist dhe basist i tyre. Më vonë ai iu bashkua grupit country-rock “Poco” si basisti i tyre origjinal në vitet 1960 përpara se të formonte “Eagles” në 1971. Ai u fut në Rock and Roll Hall of Fame në 1988 me “Eagles”.
