Krye i PD-së, Lulzim Basha ka zhvilluar ditën e sotme një mbledhje me kolegjin e Kryetarëve një ditë pas zgjedhjeve të 29 korrikut ku u shpall edhe kryetari i ri i partisë.
Në këtë mbledhje kanë marrë pjesë kryetarët e degëve, si dhe Enkelejd Alibeaj dhe Indrit Sefa.
Në fjalimin e tij hyrës Basha falenderoi të gjithë për mbarëvajtjen e zgjedhjeve dhe votuesit.
Me këtë mbledhje Basha ka nisur zyrtarisht angazhimin e tij si kryetar i PD-së ku edhe dje pas fitores u shpreh se kjo shënon nisjen e punës për të dalë nga situata e vështirë ku ndodhet partia.
“Jam i vetëdijshëm për kohën e vështirë që kemi kaluar dhe sfidat në të cilat ndodhet PD, demokratët dhe opozita.
E di se lumenjtë e mosbesimit rrjedhin akoma, ca të vërtetë, e dhimbshme siç është e vërteta e ca të sponsorizuar nga ata që duan me çdo kusht të ruajnë status quo-në.
Që e duan Shqipërinë kështu, pa mundësi ekonomike, pa liri tregu, pa konkurrencë as në politikë, as në ekonomi, me media nën presion dhe censurë, me drejtësi nën presion, pa barazi para ligjit.
Por e di po kështu se mbi të gjitha dhe para së gjithash e sotmja nuk shënon votën për një individ, as një proces të thjeshtë dhe brenda një partie, por shënon nisjen e punës.
Dhe puna fillon menjëherë për të ndërtuar mes dy brigjeve të lumenjve të mosbesimit urën mes bregut të sotëm të dëshpërimit të kaq shumë shqiptarëve të djathtë e të majtë, mes depresionit psikologjik, ekonomik e social ku e ka kredhur stanjacioni i gjithanshëm,” u shpreh ai.
