Në një kohë kur hemisfera veriore zhytet nën një valë të nxehti rekord të verës, shumë më në jug, një tjetër rekord i klimaterik po thyhet. Akulli në Antarktidë ka rënë në nivele të ulëta të paprecedentë për këtë periudhë të vitit.
Akulli në Antarktidë nuk është kthyer në nivelet e pritura, madje është në nivelin më të ulët të regjistruar prej 45 vitesh. Kjo sasi akulli e humbur është e barabartë me përmasat e Argjentinës.
Fenomeni është përshkruar nga disa shkencëtarë si i jashtëzakonshëm diçka që është kaq e rrallë, sa gjasat janë që të ndodhë vetëm një herë në miliona vjet.
Ted Scambos, një studiues i akullnajave në Universitetin e Kolorados Boulder, tha se nuk duhet krahasuar më me epokën e mëparshme.
“Loja ka ndryshuar. Nuk ka kuptim të flasim për gjasat që të ndodhë siç ishte sistemi dikur, po na tregon qartë se sistemi ka ndryshuar,” tha ai për CNN.
