Kryeministri i Kosovës, Albin Kurti ka refuzuar të përgjigjet lidhur me emërimin në postin e zëvendësministrit të Radoica Radomiroviçit.
Në mediat kosovare është përfolur ditëve të fundit se Radomiroviçi ka qenë pjesë e forcave serbe gjatë luftës në Kosovë.
Kurti në konferencën para Klinikës së Onkologjisë nuk pranoi të përgjigjej në lidhje me këtë çështje duke e cilësuar se nuk është vendi i duhur.
“Nuk është vendi i duhur për pyetje të tilla, në një konferencë tjetër unë dhe zëdhënësi do të jemi të gatshëm,” u shpreh Kurti.
Ministri i Ministrisë për Kthime dhe Komunitete, Nenad Rashiç ka hedhur poshtë pretendimet se zëvendësi i tij, Radomiroviç ka qenë pjesë e forcave serbe gjatë luftës në Kosovë.
“Normalisht që ky ka qenë propozim i imi. Unë u jam referuar organeve adekuate për një vërtetim, i cili pas 10 ditësh është kthyer si pozitiv, pra përgjigjja ka qenë se ky njeri nuk ka kurrfarë informacioni të keq që ka qenë i inkuadruar”, ka thënë ai.
