Papa Françesku i është kthyer çështjes së emigrantëve duke përmendur tragjedinë e pak ditëve më parë në Lampedusa, ku humbën jetën 41 emigrantë.
Papa tha se kjo është një plagë e hapur për njerëzimin dhe se ndjen dhimbje dhe turp lidhur me këtë situatë.
“Një tjetër mbytje tragjike ka ndodhur pak ditë më parë në Mesdhe: 41 persona humbën jetën, unë u luta për ta. Me dhimbje dhe turp duhet të themi se që nga fillimi i vitit gati 2000 burra, gra dhe fëmijë kanë vdekur tashmë në këtë det duke u përpjekur të arrijnë Evropën,” shprehet Papa Françesku.
“Është një plagë e hapur për njerëzimin tonë. I inkurajoj forcat politike dhe diplomatët që kërkojnë ta shërojnë atë në një frymë solidariteti dhe vëllazërimi si dhe angazhimin e të gjithë atyre që punojnë për të parandaluar mbytjet e anijeve dhe për të shpëtuar detarët,” tha Papa.
