Ish-ministri i Financave, Shkëlqim Cani është paraqitur në Prokurorinë e Posaçme mëngjesin e së enjtes. Ai është thirrur për t’u pyetur në cilësinë e personit që ka dijeni për koncesionin e sterilizimit.
Kjo është e disata herë që Cani paraqitet në SPAK. Më herët është thirrur për privatizimin e një ndërtese, por edhe dosjen e bujshme të inceneratorëve.
“Po sot pse ke ardhur?”-e pyetën gazetarët. “Si kaloni…?” ishte përgjigja e vetme e Canit shoqëruar me një buzëqeshje.
Sa i takon çështjes së koncesionit të sterilizimit, sot janë lëshuar gjithsej 8 urdhër arreste me vendim gjykate për zyrtarë të Ministrisë së Shëndetësisë, përfshirë këtu dhe ish-zv. ministrin, Klodian Rrjepaj.
Akuzat që rëndojnë mbi ta janë falsifikim dhe shpërdorim detyre. Ndërkohë mbi biznesmenin Ilir Rrapaj, gjithashtu i ndaluar për këtë çështje rëndon akuza e mashtrimit.
