Këngëtarja Rita Ora është tashmë në qendër të vëmendjes pas ngjarjes në koncertin e saj në Hungari ku për disa çaste performoi me flamurin serb në duar.
Fansi që supozohet t’i ketë dhënë flamurin, i quajtur Borivoje, ka folur në një intervistë për Telegrafin e Serbisë dhe ka shprehur përshtypjet e tij lidhur me ngjarjen.
“Kam lindur në Hungari, nëna ime është serbe, kam shkuar në festivalin SZIN dhe flamurin serb e mbaj gjithmonë me vete. E kam futur pa problem, në Szeged i duan shumë serbët dhe nuk kanë bërë asnjë problem,” tha Borivoje.
“Kam ardhur më herët për t’u ulur në rreshtin e parë për të xhiruar një video për në Instagram me flamurin e Serbisë në koncertin e Ritës. Më befasoi edhe ajo, ma mori flamurin nga dora. Unë thjesht doja të bëja një video për TikTok. Askush tjetër nuk ishte me flamurin e Serbisë përveç meje,” tha i riu.
Ai ka treguar se më pas nuk ka pasur asnjë problem dhe se pas koncertit ka biseduar me një shqiptar që ka parë gjithçka dhe i ka thënë se ishte shumë i zhgënjyer nga Rita.
“Nuk pata asnjë problem pas kësaj. Unë pas koncertit fola me një shqiptar dhe i thashë se ajo ma mori flamurin nga dora, dhe ai tha se nuk ishte faji im dhe se ishte shumë i zhgënjyer prej saj,” shton Borovioje.
