Ministri i Punëve të Brendshme i Kosovës, Xhelal Sveçla ka reaguar në lidhje me shpërthimin e regjistruar mbrëmjen e djeshme në veri të Mitrovicës.
Sveçla u shpreh se hedhja e granatës ushtarake u bë me urdhër të presidentit të Serbisë, Aleksandar Vuçiç.
Më tej ministri shtoi se akti kriminal u bë si shenjë revolte për tre të arrestuarit për krime lufte.
“Inspirimi, mbështetja dhe urdhri për këtë akt kriminal ka ardhur nga ish Ministri i Propagandës në kohën e Millosheviçit, Aleksandër Vuçiç.
Serbia ka kryer gjenocid në Kosovë. Serbia me në krye Vuçiçin, jo vetëm që nuk e pranon këtë fakt, por glorifikon kriminelët e luftës. Dëshmia e qëndrimit të saj të pandryshuar është vetë planifikimi i aktit të hedhjes së granatës”, ka shkruar Sveçla.
“Kosova do të jetë shtet i së drejtës, i qytetarëve të barabartë ku barazia dhe prosperiteti do të garantohen për të gjithë,” shtoi më tej ai.
