Kryeministri Edi Rama ndodhet në një vizitë zyrtare në Zagreb, ku është pritur me ceremoni shtetërore nga homologu Andrej Plenković. Takimi kokë më kokë dhe me delegacionit u pasua nga konferenca për mediat. Kryeministri kroat u shpreh i gatshëm për të ndihmuar Shqipërinë në procesin e integrimit në BE.
Më pas fjalën e mori Edi Rama. Tha se Kroacia është udhërrëfyes për Shqipërinë. Theksoi se qeveria do të bëjë disa ndryshime në ligjin për fondet e BE-së për bujqësinë pas skandalit me abuzimet. “Do të bëjmë disa korrektime në ligjin për marrjen e fondeve të BE-së për bujqësinë” tha ai.
Më pas fokusi u zhvendos tek Kosova pas sulmit terrorist në Banjskë. “Ne konsiderojmë se të dyja, vrasja e një efektivi të policisë së Kosovës nga një grup kriminal i armatosur gjerë në dhëmbë i veshur ushtarakisht në territorin e Kosovës dhe zija e shpallur në Beograd për anëtarët e këtij grupi janë të pajustifikueshme, të dënueshme në të gjitha nivelet.
Shfaqja e ushtrisë serbe në kufi me Kovën vetëm rrisin frymën e ndasive që ne duhet të kurojmë. Është pozitive që ushtria serbe filloi të zmbrapset dhe të tërhiqet, por është shumë negative që ushtria serbe përdoret për shfaqje të tilla” tha Edi Rama.
Shqipëria dhe Kroacia nënshkruan marrëveshjen që siguron njohjen e kontributeve të sigurimeve shoqërore të qytetarëve të të dy vendeve.
