Pas katër denoncimeve për dhunë në çerdhe, kopshte dhe shkolla, ministrja e Arsimit, Ogerta Manastirliu doli në një konferencë për mediat duke folur për një reformë që po përgatitet. Për momentin theksoi se Task Forca ka vijuar kontrollet në institucionet e arsimit parashkollor.
“Nga kontrollet e këtyre ditëve janë inspektuar 90 kopshte jopublike dhe 67 prej tyre ushtrojnë veprimtari në përputhje me ligjin. 8 kopshte rezultojnë të mos kenë aplikuar për licencimin përkatës dhe 2 prej tyre i është refuzuar licencimi.
Në rast të mosplotësimit të dokumentacionit dhe pajisjes me licencën përkatëse do të vijohet me masat që parashikon ligji, gjobë në 500 mijë deri në 1 mln lekë të reja dhe ndërprerje e menjëhershme e veprimtarisë. Paralelisht praktikat do t’u referohen organeve kompetente bazuar në legjislacionin në fuqi”, tha Manastirliu.
