West Ham United siguroi një fitore të vështirë por të merituar 2-0 ndaj Manchester United në Londër .
Një fitore e cila ndihmon David Moyes dhe të tijët për të kapërcyer skuadrën e Erik ten Hag në tabelën e Premierligës dhe për t’i lënë Djajtë e Kuq pa gol në katër ndeshjet e tyre të fundit në të gjitha garat.
Të zotët e shtëpisë vinin pas një disfate të thellë në kampionat 5-1 përballë Liverpool, tek United nga ana tjetër bëri më shumë bujë vendosja e 19-vjeçarit Willy Kambwala si titullar, sesa mungesa e fitores dhe golit në 3 ndeshjet e fundit.
Pjesa e parë pa të dyja ekipet të përpiqeshin me skuadrën e Moyes që u vendos mirë në prapavijë , për të kërkuar një fitore mëse të merituar në pjesën e dytë.
Bowen u dha epërsinë “Hammers” në të 72-tën, sulmuesi i improvizuar uli në mënyrë të shkëlqyer topin e Lucas Paquetá-s mbi mbrojtjen e United dhe përfundimi i tij rikoshet mposhti Onanën.
Mohammed Kudus shtoi golin e dytë të West Ham-it, dhe në këtë mënyrë mbylli përfundimisht ndeshjen, me Manchester United që nuk mundi kurrë të rrezikonte siç duhej.
West Ham ngjitet në vendin e 6-të në Premier League, ndërsa United zhytet në vendin e 8-të.
