Deputeti Dashamir Shehi u shpreh mbrëmjen e sotme në emisionin “5Pyetjet nga Babaramo” se drejtësia e re nuk çalon tek fakti që po godet Sali Berishën, por te dosjet “mal” të qytetarëve që janë ende në pritje. Kreu i LZHK-së beson se pas drejtësisë së re nuk qëndron Edi Rama, por SHBA.
“Ndonjëherë kemi mbyllur gojën kemi thënë “fluturon gomari”, por nuk shkon më kjo punë. Tani në janar duhen marrë disa vendime. Unë jam prej atyre që them se këtë drejtësi nuk e shtyn përpara Edi Rama.
Ai ka futur njerëzit e vet aty, sepse ia lamë ne, sikur bëmë me reformën administrative dhe elektorale. Ndoshta e ka deformuar edhe në favor. Por këtë drejtësi e shtyjnë të huajt. Dhe kur e shtyjnë ata, jo vetëm kundër këtyre por do ta shtyjnë edhe kundër Edi Ramës.
Atij (Edi Ramës) nuk i leverdis kjo situatë, se “më vjen radha mua”. Amerikanët janë investuar tek kjo. Ne nuk mund të rrimë gjithë ditën duke anatemuar një shtet të madh, që ne si parti na doli në krah në ’90. Drejtësia jonë difekton se i ka bërë dosjet mal. Për dosjet e qytetarëve nuk kujtohet njeri.
Drejtësia difekton se nuk ka personel, se ka shtuar numrin e dosjeve dhe përfundojnë të gjitha pothuajse në shkallë të tretë (e Larta). Gjykata Administrative nuk zgjidhi shumë punë. Shpërndarja e re ka hapur shumë probleme për qytetarët” tha ai.
