Biznesmeni 66-vjeçar, Musa Hamiti, i cili u shpall i zhdukur në datën 10 janar të këtij viti, është gjetur i vdekur në bodrumin e një ashensori, në një ndërtesë në Kosovë.
Policia e Kosovës njofton se trupi i tij është dërguar në Institutin e Mjekësisë Ligjore, nga ana tjetër kanë nisur menjëherë hetimet për vdekjen e tij.
“Ju njoftoj se me datë 26.02.2024, rreth ores 22:37, policia e Kosovës, stacioni policor në Gjilan ka marrë një informatë se në bodrumin e një ashensori të një ndërtese në rrugën Gjilan -Kamenicë është vrejtur një person i vdekur” thuhet në njoftimin e policisë.
Në lidhje me rastin në datën 9 janar janë arrestuar dy të dyshuara, Marinela Markoviç dhe Silvana Dulellari, të dyja nga Shqipëria, bashkë me to dhe disa persona të tjerë ende të pa identifikuar janë të dyshuar në lidhje me ngjarjen. Në dosjen e prokurorisë shpjegohet se këta persona me qëllim të përfitimeve ekonomike pra pasurore e kanë rrëmbyer biznesmenin Musah Hamiti, i cili jetonte në Zvicër dhe prej më shumë se një muaj rezultonte i zhdukur.
“Pasi të pandehurat e kuptojnë se i zhdukuri Musah, ka me vete shumën e të hollave në vlerë prej 86250 franga zvicerane dhe 391 €, i cili po me të njëjtën ditë është kthyer nga Hajvalia, pasi është liruar nga Qendra e Paraburgimit në Hajvali, ku kishte qenë në vuajtje të dënimit në kohëzgjatje prej 25 ditëve, me të kthyer në Gjilan, me taxi të kompanisë ‘’Golden Taxi’’ me datë 09.01.2024, takohet me të pandehurat e lartcekura, e pasi takimit me të njëjtat humb çdo gjurmë e tij, me ç’rast nga kjo ditë nuk dihet për fatin e tij” thuhet në dosjen e prokurorisë.
