Mijëra persona me lule në duar – të rrethuar nga forcat e sigurisë – janë mbledhur nëpër rrugët afër Kishës “Ikona e Nënës dhe Zotit” dhe varrezës Borisovskoye në Moskë, ku zhvillohet ceremonia e varrimit të kritikut të Kremlinit, Aleksei Navalny.
Ceremonia në kishë ka përfunduar dhe trupi i tij tani është duke u dërguar te varri.
Prindërit e Navalnyt, Anatoliy and Lyudmila, janë parë duke marrë pjesë në ceremoninë në kishë, por asnjëri nuk ka bërë ndonjë koment publik.
Aleati i Navalnyt, Ivan Zhdanov, i ka inkurajuar njerëzit që të ecin në këmbë prej kishës deri te varri, që është rreth 30 minuta larg.
Disa persona janë dëgjuar duke bërtitur jashtë kishës “ekzekutues”, “Rusia do të jetë e lirë”, “jo luftës”.
Të tjerë kanë thënë duke qarë, “nuk do të të harrojmë”.
Ceremonia është mbajtur te kisha në qarkun Marjino, ku ka jetuar Navalny për një kohë, sipas ish-zëdhënëses së tij, Kira Yarmysh.
Diplomatë të huaj, përfshirë ambasadorët e Shteteve të Bashkura, Gjermanisë, Francës kanë shkuar në kishë për të nderuar Navlanyn.
Ata janë parë të veshur në të zeza dhe me trëndafila në duar.
