Elia Zaharia u paraqit paraditen e kësaj të hëne në Gjykatën Civile të Tiranë për seancën e radhës për procesin e divorcit mes saj dhe Princit Leka. Ky i fundit nuk shkoi në gjykatë. Por përse nuk shkoi në gjyq? A ka një tërheqje nga Princi nga një marrëveshje e mundshme që palët mund të kishin arritur më parë? Çfarë do të ndodhë tani me vajzën?
Po pasuria, sa do të marrë Elia? Të gjitha këtyre pyetjeve që qarkullojnë u dha përgjigje avokati i njohur Alban Duraj në një intevistë për “5Pyetjet.al” me skype. Çifti mbretëror, i cili ka një vajzë, njoftoi zyrtarisht ndarjen pas 8 vitesh martesë më 15 Janar të vitit 2024 dhe ranë dakord që divorci të ishte me marrëveshje mes palëve, por sherri dhe dhuna pak javë më parë përmbysi gjithçka.
Ata u kthyen në qendër të vëmendjes më 6 Mars, kur paditën njëri-tjetrin në polici për dhunë. Si Princi Leka, ashtu sikurse edhe Elia Zaharia iu drejtuan gjykatës me kërkesë për urdhër mbrojtjeje. Më datë 7 Mars, Gjykata e Tiranës i miratoi këto urdhra mbrojtjeje dhe sipas vendimit ata duhet të qëndrojnë 5 metra në distancë. Princi duhet ta takojë vajzën e tij 3 vjeçare, jo në prezencë të Elias, por të dados.
