Të paktën 5 persona, përfshirë dhe një foshnjë humbën jetën nga një tornado vdekjeprurëse që goditi Oklahoman në fundjavë me mot ekstrem që la dhjetëra të plagosur dhe dëme të përhapura në të gjithë shtetet e Midperëndimit.
Autoritetet lokale konfirmuan se një foshnjë katër muajshe ishte në mesin e dy të vdekurve në Holdenville, Oklahoma, ku rreth 20 tornado goditën të shtunën vonë, duke rrafshuar ndërtesat dhe duke këputur çatitë.
Një vdekje e tretë ndodhi pranë Marietta në Interstate 35 (I-35), i cili u mbyll të dielën në kufirin e Teksasit për shkak të përmbysjes së automjeteve dhe linjave të energjisë përgjatë autostradës. Trupi i një gruaje, viktima e katërt, u nxor nga rrënojat pranë një lokali në qendër të qytetit Sulphur.
Guvernatori i Oklahomas, Kevin Stitt, ka shpallur gjendjen e jashtëzakonshme në 12 qarqe të Oklahomas. Përpjekjet e kërkim-shpëtimit vazhduan të dielën ndërsa shërbimet e urgjencës iu përgjigjën dëmeve të përhapura të shkaktuara nga breshri, erërat e forta dhe përmbytjet.
Që nga e diela pasdite, rreth 25,000 klientë në Oklahoma (rezidenciale dhe biznesi) – dhe gati 30,000 në Teksas – ishin pa energji elektrike. Më shumë se 100 tornado kanë goditur rajonin më të gjerë të shteteve të Midperëndimit./DW
