Në 12 Maj, kur Edi Rama ka njoftuar se do të jetë në Athinë në një takim me emigrantët shqiptarë bëhet fiks një vit nga arrestimi i Fredi Belerit. Gazeta greke “Kathimerini” shkruan se qeveria greke i kërkoi kryeministrit shqiptar që vizita në Athinë të shtyhej pas zgjedhjeve të 9 Majit për Parlamentin Europian, por që Edi Rama nuk pranoi.
“Rama njoftoi jozyrtarisht synimin e tij për të vizituar Athinën. Ministria e Jashtme i bëri me dije të besuarit të zotit Rama se nisur nga faza parazgjedhore që po kalon Greqia për shkak të zgjedhjeve europiane, do të ishte e preferueshme të shtyhej për pas datës 9 qershor. Që atëherë, ftesa e Athinës është shpërfillur dhe kryeministri shqiptar thuhet se është i vendosur për të realizuar vizitën.
Nisur nga atmosfera e ngarkuar me ngjarje të Himarës, udhëtimi i Ramës mund të nxisë konfliktin e brendshëm politik, duke e ngritur lart çështjen Beleri në axhendën e debatit publik. Apo edhe të provokojë reagime nga elementi verior kontinental në Athinë, gjë që qeveria definitivisht nuk e dëshiron.
Burime diplomatike në Tiranë dhe Athinë theksuan se vizita e planifikuar mund të ketë objektivisht elementin e shfaqjes së forcës, ku Rama tenton të instrumentalizojë votën në zgjedhjet europiane të dhjetëra mijëra emigrantëve shqiptarë që kanë të drejtën ligjore për të votuar si shtetas grekë, në përgjigje të kandidaturës së Beleri.
Megjithatë, një ngjarje e tillë, edhe nëse Rama i shmang referimet për zgjedhjet europiane, në çdo rast do të përbënte përfshirje indirekte në proces” shkruan “Kathimerini”.
