Presidenti i Republikës, Bajram Begaj ka uruar sot Gordana Siljanovska-Davkova pasi u zgjodh Presidente e Republikës së Maqedonisë së Veriut, si e para grua në krye të shtetit.
Nëpërmjet një postimi në rrjetin social “X” Begaj shprehu bindjen për forcimin e mëtejshëm të marrëdhënieve mes dy vendeve.
“Urime, Gordana Siljanovska-Davkova, e para grua e votuar si Presidente e RMV. Jam i bindur se së bashku do të forcojmë më tej marrëdhëniet tradicionalisht shumë të mira midis vendeve tona mike, si vende anëtare në NATO dhe anëtare të ardhshme në BE, për të cilën shqiptarët në RMV mbeten tërësisht të angazhuar”, shkroi Begaj.
