Një ngjarje e rëndë ka ndodhur mesditën e kësaj të hëne në fshatin Baltëz të Fierit, ku raportohet se, gjatë një konflikti të çastit, ka mbetur i vdekur një punonjës policie i repartit “Shqiponja”, i identifikuar si Novruz Cenaliaj.
Sipas policisë së Fierit, Asllan Mërnica ka vrarë me armë zjarri Novruz Cenaliajn punonjës policie i Forcës së Posaçme “Shqiponja” të DVP Fier, jashtë shërbimi, por i veshur me uniformën e Policisë, pasi shkonte për të marrë shërbimin.
Menjëherë në vendngjarje janë nisur shërbimet e Policisë, Forca Kombëtare e Sigurisë, Reparti Special “RENEA”, të cilat kanë rrethuar zonën dhe vijojnë punën për kapjen e autorit. Edhe babai i efektivit punon në drejtorinë e policisë Fier.
