Kryeministri i Sllovakisë, Robert Fico është plagosur me armë zjarri këtë të mërkurë. Ai është qëlluar jashtë Shtëpisë së Kulturës, aty ku po mbahej një mbledhje e qeverisë.
Sipas mediave vendase, Fico ishte duke folur me disa qytetarë jashtë ndërtesës kur u dëgjuan disa të shtëna.
Autori i dyshuar është arrestuar, ndërsa kryeministri është dërguar në spital me urgjencë.
Nënkryetari i Parlamentit të Sllovakisë, Lubos Blaha, konfirmoi incidentin gjatë një seance parlamentare, të cilën e shtyu për datë të papërcaktuar, njoftoi agjencia sllovake e lajmeve, TASR.
Nuk dihet sa rëndë mund të jetë plagosur Fico. Gazetarët, të cilët ishin në vendin e ngjarjes, thanë se u dëgjuan disa të shtëna me armë.
Ata shtuan se zyrtarët e sigurisë e futën një person në një veturë dhe u larguan me shpejtësi.
I arrestuari besohet se është i dyshuari që shtiu mbi kryeministrin, megjithëse kjo nuk është konfirmuar nga policia lokale.
