Dy persona janë plagosur mbrëmjen e djeshme gjatë një konflikti të çastit në Gjirokastër. Autori i plagosjes Erion Kola është arrestuar. Dy të lënduarit ndodhen në spital.
“Menjëherë pas njoftimit, mbrëmjen e djeshme, për një konflikt ndërmjet 3 shtetasve, Seksioni për Hetimin e Krimeve të Rënda i DVP Gjirokastër nisi hetimet për të nxjerrë përpara përgjegjësisë penale shtetasin/t përgjegjës, si dhe për zbardhjen e rrethanave të këtij konflikti.
Si rezultat, u kap dhe u vu në pranga shtetasi Erion Kola 45 vjeç, i cili dyshohet se gjatë një konflikti të çastit, për motive të dobëta, ka dëmtuar me mjet prerës (thikë), shtetasit E. B., 40 vjeç dhe F. D., 37 vjeç, të cilët janë në kujdesin e mjekëve dhe jashtë rrezikut për jetën” njofton policia.
