Edhe pak ditë na ndajnë nga nisja e Europianit. Shqipëria ndeshjen e parë e luan përballë Italisë. Kapiteni Berat Gjimshiti shprehet në një intervistë për “Gazzetta Dello Sport” se ka respekt për Italinë, por shton se nuk duhet ta mbivlerësojnë.
“Kur luan kundër një kombëtareje si Italia nuk është se ke shumë avantazhe në favor, por kur e njeh kundërshtarin të shërben shumë për mënyrën si përballesh në fushë. Nëse nisemi mirë kundër Italisë, atëherë do të fitonim besim edhe për ndeshjet e radhës, do të mund t’i menaxhonim më mirë ato.
Italia sigurisht që është favoritja të shtunën, unë e di sepse e njoh potencialin e atyre që para tre vitesh u shpallën Kampionë të Europës. Edhe pse pas vitit 2021, Italia ka pasur ulje dhe ngritje. Janë një kundërshtar që duhet t’i respektojmë, por jo t’i mbivlerësojmë”, u shpreh Gjimshiti.
