Ish-ministri i Brendshëm, Saimir Tahiri është rikthyer sërish në dyert e drejtësisë për të dhënë llogari. Këtë herë për pasurinë. Ditën e sotme, i shoqëruar nga avokati Maks Haxhia u paraqit në SPAK dhe qëndroi për rreth dy orë.
Paraprakisht raportohet se prokurori Elvin Gokaj e ka pyetur për pasurinë lidhur me disa transaksione financiare. Për këtë dosje janë pyetur edhe persona të tjerë, mes tyre biznesmenë.
Prokuroria ka kërkuar informacion në bankat e nivelit të dytë, institucione e agjenci të pronave për të verifikuar pronat e llogaritë bankare të ish-ministrit të Brendshëm, dhe transaksionet që ai ka kryer. Në dalje nuk pranoi që të bënte asnjë koment për mediat.
Fiks një vit më parë gjykata e shkallës së parë e Elbasanit e liroi nga burgu ish-ministrin e Brendshëm, ndërsa i kishte mbetur pa shlyer edhe një vjet e tetë muaj nga dënimi.
Tahiri u dënua me tre vjet e katër muaj heqje lirie, në shkurt të vitit 2022, nën akuzën e “shpërdorimit të detyrës” për dosjen “Habilaj”.
Gjykata e argumentoi lirimin e tij me një raport të Institutit të Mjekësisë Ligjore, ku theksohej se bashkëshortja e ish-ministrit të Brendshëm, për shkak të problemeve shëndetësore, nuk mund të kujdeset për dy fëmijët e çiftit.
Rikthehen telashet me drejtësinë! Saimir Tahiri futet në SPAK
