Gazeta greke “Kathimerini” shkruan se Fredi Beleri do të jetë në Strasburg të martën e ardhshme, për të marrë pjesë në seancën plenare të Parlamentit Evropian dhe për të marrë zyrtarisht detyrën e tij si eurodeputet. “Autoritetet shqiptare, pas presioneve të shumëanshme, i dhanë atij një leje pesë-ditore për të marrë pjesë në seancën plenare të Parlamentit Evropian dhe për të marrë detyrën si anëtar i tij” shkruan më tej gazeta.
Gazeta tjetër greke “Protothema” thekson se vendimi i Shqipërisë për t’i dhënë një leje pesëditore “nuk erdhi lehtë dhe ishte produkt i presioneve greke dhe evropiane”.
“Mesazhi ishte; është e paimagjinueshme që një eurodeputet i zgjedhur të mos betohet në Strasburg pas marrjes së postit të tij, veçanërisht kur ai mbahet në një vend aderues në BE. Në fund të fundit, duke vuajtur dënimin e vendosur nga gjykata e apelit, zoti Beleri gjithsesi do të dalë nga burgu në vjeshtë.
“U bë gjëja e qartë që nuk ndodh gjithmonë. Tani janë shpallur zgjedhje të reja në Himarë dhe duam që ato të jenë të lira dhe të ndershme”, komentoi një burim qeveritar në vazhdën e vendimit shqiptar. Kënaqësia në Pallatin Maximos ishte e qartë, natyrisht pa asnjë festë, pas asaj që është bërë që i ka çuar marrëdhëniet greko-shqiptare në një “ulje barometrike” thuhet më tej.
“Ka pasur, siç raportojnë burime kompetente për protothema.gr, procese intensive nga pala greke. Këto janë bërë edhe në nivelin më të lartë të qeverisë, por edhe nga drejtuesit e Ministrisë së Jashtme, George Gerapetritis dhe Alexandra Papadopoulou.
Sipas informacioneve, në Samitin e NATO-s në Uashington nuk ka pasur asnjë takim mes Mitsotakis dhe Ramës. Bashkëpunëtorët e kryeministrit, megjithatë, kujtuan se, pas Këshillit të fundit Evropian, z. Mitsotakis kishte deklaruar optimizmin e tij se z. Beleri në fund do t’i jepej leja për të bërë betimin.
Sipas të njëjtit informacion, procesi për dhënien e lejes u intensifikua ditët e fundit, ndërkohë që ky zhvillim duket se është vulosur në një takim të shkurtër të zhvilluar në margjinat e Samitit të NATO-s nga Ministri Giorgos Gerapetritis me homologun shqiptar Igli Hasani, i cili me sa duket kishte autorizim politik nga zoti Edi Rama” shkruan gazeta.
