Më 31 korrik, banorët e Librazhdit organizuan një protestë në aksin rrugor Librazhd-Elbasan për të kundërshtuar ndërtimin e rrugës Elbasan-Qafë Thanë, që po realizohet nga Autoriteti Rrugor Shqiptar.
Protestuesit bllokuan qarkullimin dhe kërkuan ndryshimin e projektit, i cili ndan fshatrat dhe dëmton shtëpitë dhe tokat bujqësore. Policia ka proceduar pesë individë për “Organizimin dhe pjesëmarrjen në grumbullime të paligjshme”.
Të proceduarit janë: A. M., 38 vjeç; S. T., 21 vjeç; E. M., 23 vjeç; E. A., 28 vjeç; dhe B. Rr., 36 vjeç. Protesta e banorëve theksoi shqetësimet e tyre për mungesën e hyrjeve në fshat nga rruga e re, e cila është pjesë e korridorit VIII dhe ka një kosto totale prej 10 miliardë lekësh.
