Gjykata e Apelit ka konfirmuar masën e sigurisë “arrest në burg” për Erdion Muho, i akuzuar për tentativën e shkatërrimit të një trageti në Sarandë me eksploziv.
Muho, një biznesmen 35-vjeçar dhe pronar i një agjencie turistike që operon në linjën Sarandë-Korfuz, ishte ndaluar më 28 korrik.
Dyshohet se ai ka bashkëpunuar me Armand Nelaj, i cili humbi jetën në një shpërthim eksplozivi më 24 qershor në Portin Detar Sarandë. Hetimet sugjerojnë se shpërthimi kishte për objektiv një traget dhe se motivi mund të ketë qenë konkurrenca në biznes.
Prokuroria vazhdon hetimet për të zbardhur detajet e ngjarjes dhe lidhjet e mundshme të Muho me veprën penale.
