Pas ceremonisë së mbylljes së Lojërave Olimpike në Paris, një ngjarje tragjike ka tronditur eventin e madh. Një vullnetare 21-vjeçare, e angazhuar për të ndihmuar në Stade de France, është gjetur e vdekur në shtëpinë e shoqëruesit të saj.
Viktima ishte parë për herë të fundit rreth orës 01:00 të mëngjesit të hënës në bulevardin Ney. Katër orë më vonë, familja e saj njoftoi autoritetet pas marrjes së një mesazhi nga një i njohur, ku thuhej se shoqëruesi i gruas kishte bërë “një marrëzi”.
Policia, e alarmuar nga ky informacion, shkoi në apartamentin e shoqëruesit në lagjen 18, ku gjeti trupin e pajetë të viktimës. Ajo kishte mavijosje në mollëz dhe shenja gjaku në qafë.
Shoqëruesi i viktimës, i cili ndodhej në apartament në një gjendje gjysmë komatoze, u ndalua menjëherë nga policia. Hetimet janë duke u kryer nga rrethi i dytë i policisë gjyqësore të Parisit (PDJ), i cili ka marrë në dorë rastin për akuzat e vrasjes me dashje.
Ngjarja ka shkaktuar një reagim të fortë në rrjetet sociale, ku miqtë dhe familjarët e viktimës kanë shprehur ngushëllimet dhe mbështetje për të afërmit e saj.
