Xherdan Shaqiri dhe Chicago Fire kanë ndërprerë marrëveshjen me konsensus të dyanshëm. Skuadra e MLS konfirmoi largimin e tij pas dy vitesh, duke i shprehur falënderime për kontributin e dhënë.
“Pas diskutimeve me Xherdanin, kemi ndarë rrugët me marrëveshje të dyanshme. E falënderojmë për kontributin në klub dhe i dëshirojmë atij suksese në të ardhmen,” tha drejtori sportiv i Chicago Fire, Georg Heitz.
Shaqiri, i cili u transferua në Chicago Fire nga Lyon në shkurt të vitit 2022, ka zhvilluar 75 ndeshje dhe ka shënuar 16 gola për klubin. Ai ka theksuar se është koha e duhur për të eksploruar mundësi të reja në karrierën e tij.
“Dua të falënderoj klubin dhe tifozët për mbështetjen gjatë kohës sime këtu dhe i dëshiroj më të mirën Chicago Fire në të ardhmen,” tha Shaqiri.
Në karrierën e tij, Shaqiri ka luajtur për klube të mëdha si Basel, Bayern Munich, Inter, Stoke City, Liverpool dhe Lyon.
