Ministri i Drejtësisë, Ulsi Manja, ka ftuar qytetarët të aplikojnë në portalin e-Albania për shërbimin e vlerësimit të ekspertëve në gjykata.
Në një postim në rrjetet sociale, Manja theksoi se kjo mundësi ofron informacion në kohë reale dhe nuk kërkon dokumente shoqëruese.
“Nëse keni nevojë për vlerësimin e një ose më shumë ekspertëve, mund të përfitoni nga shërbimi i Ministrisë së Drejtësisë, “Vlerësim i Ekspertëve në Gjykata,” përmes portalit e-Albania”, shkroi Manja.
Ai inkurajoi qytetarët që të përfitojnë nga ky shërbim për të përmirësuar efikasitetin dhe transparencën në procesin gjyqësor.
“Informacionin e merrni në kohë reale pa pasur nevojë për dokumente shoqëruese”, theksoi më tej ministri Manja.
