Një zjarr i fuqishëm ka shpërthyer në masivin pyjor me mështekna në Novosej të Kukësit, duke shpërndarë flakët në një sipërfaqe të konsiderueshme. Thatësira dhe era e fortë kanë ndihmuar në përhapjen e shpejtë të zjarrit.
Shërbimet zjarrfikëse të bashkisë Kukës, punonjësit e shërbimit pyjor, administrata e zonave të mbrojtura dhe banorët e zonës kanë ndërhyrë menjëherë për të ndaluar përhapjen e mëtejshme të flakëve.
Tani, zjarri është izoluar dhe po punohet për shuarjen e plotë të tij. Ky masiv pyjor është pjesë e parkut kombëtar Korab-Koretnik dhe përfshin meshtekna, një dru i rrallë me vlera dekorative dhe kurative.
