Në një takim me të rinjtë e LRI-së në Jalë, Presidenti i Partisë së Lirisë, Ilir Meta, përsëriti angazhimin për të arritur 4 milion shqiptarë në Shqipëri nëse partia e tij vjen në pushtet.
Duke i referuar shprehjes së gjyshërve për të mbajtur qëndrimin e lartë në kohë të vështira, Meta kritikoi qeverisjen aktuale për korrupsionin dhe uljen dramatike të lindshmërisë, duke theksuar se Shqipëria është në një krizë kombëtare.
‘Gjyshërit na ka mësuar malet tona më të larta, kur janë kohët më të vështira, malet tona edhe më të larta. Jemi në një situatë tepër kritike, ku si pasojë e grushtit të shtetit pa autoblinda por me shkelje të kushtetutës, me betimin e prokurores tek Lana. Pasojat janë katastrofike, korrupsioni më i lartë se kurrë ndonjëherë. Vendi i parë për korrupsion, vendi i parë për shpopullim.
Vetë OKB konfirmoi këto ditë se lindshmëria mesatare është në një pikiatë të frikshme që ua kalon dhe vendeve në luftë. Nga 3.4 fëmijë për grua në 1980 mesatarja e lindshmërisë në 2023 u tkurr në 1.4 fëmijë për grua. Shqipëria nga vendi i dytë është në vendin 177 në botë në klasifikimin e OKB, alarm kombëtar dhe kushtrim për ndryshim urgjent dhe këtij raporti që ka prodhuar agjenda e Ramoviçit. Ne do ta bëjmë me çdo çmim me 4 milion shqiptar plus.‘, tha Meta.
Ai përmendi shembuj si Hungaria e Viktor Orbanit për të ilustruar suksesin e politikave pro-familjes.
‘Hungaria ishte nga vendet me lindshmëri më të ulët, por falë politikave konkrete patriotike të Viktor Orbanit është në rritje. Do ta mundësojmë përmes vënies në jetë të 5 prioriteteve që përmbajnë masa konkrete për forcimin e kombit, që kanë prioritet fuqizimin e familjes shqiptare.
Për të arritur këtë objektiv do forcojmë arkëtimin e të ardhurave ne buxhetin e shtetit. Kemi një program, të qartë për të rritur të ardhurat që bazohet në përvojat më të mira të rajonit tonë.’, u shpreh Meta.
