Presidenti i Francës, Emmanuel Macron, ka bërë thirrje për ndalimin e dërgesave të armëve për Izraelin, duke e cilësuar këtë si një hap të nevojshëm për të ndalur operacionet hakmarrëse të Izraelit në Gazë kundër Hamasit, i cili është shpallur organizatë terroriste nga SHBA dhe BE.
Në një intervistë për transmetuesin France Inter, Macron deklaroi “Prioriteti është të kthehemi te një zgjidhje politike dhe të ndalojmë dërgimin e armëve për luftën në Gazë.” Ai gjithashtu konfirmoi se Franca nuk po dërgon armë në këtë drejtim.
Megjithatë, Franca nuk është një furnizues i madh i armëve për Izraelin; vitin e kaluar, dërgesat e pajisjeve ushtarake arritën në 33 milionë dollarë, në krahasim me 3 miliardë dollarë që SHBA i ofruan Izraelit. Në shtator, Britania njoftoi pezullimin e eksporteve të armëve për Izraelin, duke iu referuar rreziqeve që ato mund të përdoren në shkelje të ligjit ndërkombëtar.
Macron shprehu shqetësim për vazhdimin e konfliktit, duke theksuar se ky nuk është vetëm një problem për palestinezët, por ndikon edhe në sigurinë e Izraelit. Ai paralajmëroi për rrezikun e përshkallëzimit të dhunës mes Izraelit dhe Hezbollahut në Liban, duke thënë se “Libani nuk mund të bëhet Gaza e re”.
Më 7 tetor, do të shënohet njëvjetori i sulmit të paprecedent nga Hamasi, që çoi në luftën aktuale në Gazë, ku janë raportuar rreth 42,000 palestinezë të vrarë si pasojë e ofensivës izraelite.
