Presidenti ukrainas Volodymyr Zelensky ka deklaruar se Rusia planifikon të dërgojë trupat e Koresë së Veriut në fushën e betejës duke filluar nga data 27-28 tetor, sipas raporteve të inteligjencës.
Ai u bëri thirrje aleatëve për të ushtruar presion mbi Moskën dhe Phenianin si përgjigje ndaj kësaj “lëvizjeje të përshkallëzuar”.
Zelensky njoftoi se prokurorët ukrainas kanë hapur një hetim mbi mbështetje të mundshme nga Koreja e Veriut për Rusinë në luftë, duke e cilësuar këtë si një krim agresioni. Ndërkohë, shërbimi i inteligjencës ushtarake të Ukrainës dhe disa qeveri perëndimore raportojnë se ushtarët e Koresë së Veriut, të trajnuar në Rusi, janë vendosur në rajonin Kursk.
Kremlini ka hedhur poshtë këto akuza si “lajm të rremë”, por Putin nuk e ka mohuar drejtpërdrejt praninë e trupave koreano-veriore në Rusi.
