Serbia ka filluar hetime për shembjen e një strehe betoni mbi hyrjen e një stacioni hekurudhor në Novi Sad, ngjarje që rezultoi me vdekjen e 14 personave. Aksidenti ndodhi të premten, në një ditë me mot të mirë, ndërsa ekipet e kërkim-shpëtimit punuan gjatë natës për të nxjerrë të vdekurit dhe të plagosurit nga rrënojat.
Ministri i Transportit, Goran Vesiç, ka njoftuar se hetimet do të përfshijnë Institutin shtetëror të Trafikut, kompaninë shtetërore të hekurudhave, dhe një konsorcium kinez që kishte kryer punimet për renovimin e stacionit. Ai tha se do të verifikohen vendimet dhe përgjegjësitë për kontrollin e cilësisë së punimeve.
Ministri i Brendshëm, Ivica Daçiç, ka njoftuar se 20 persona do të intervistohen, duke përfshirë zyrtarë të ministrisë. Autoritetet shpallën të shtunën si ditë zie, ndërsa qytetarët vendosën lule dhe ndezën qirinj për të nderuar viktimat. Opozita serbe, që akuzon qeverinë për korrupsion dhe nepotizëm, ka bërë thirrje për protesta në Novi Sad. Presidenti Aleksandar Vuçiç ka premtuar drejtësi dhe ndëshkime për përgjegjësit.
