Në intervistën e tij të parë pas fitores së mandatit të dytë presidencial, Donald Trump shprehu angazhimin për të realizuar një nga premtimet më të mëdha të fushatës së tij: dëbimet masive të emigrantëve pa dokumenta. Presidenti i zgjedhur i tha NBC News se një nga prioritetet e tij, kur të marrë detyrën në janar, do të jetë “të bëjë kufirin të fortë dhe të fuqishëm”, duke theksuar se administrata e tij nuk do të ketë alternativë tjetër përveçse të zbatojë një fushatë të gjerë dëbimi.
Trump, i cili pati një fitore të thellë ndaj nënpresidentes Kamala Harris, vlerësoi këtë rezultat si një mandat për të sjellë “logjikë të shëndoshë” në qeverisje. Ai u shpreh “Ne padyshim duhet ta bëjmë kufirin të fortë dhe të fuqishëm, por gjithashtu duam që njerëzit të vijnë në vendin tonë. Ata duhet të vijnë ligjërisht, me dashuri për vendin.”
Përsa i përket kostos së një fushate dëbimi, Trump u shpreh se nuk është një çështje kostoje, duke theksuar se nuk kishte “zgjidhje tjetër” pasi shumë emigrantë, sipas tij, janë të përfshirë në aktivitete kriminale si vrasje apo trafik droge. Ai shpjegoi se nuk kishte një çmim për sigurimin e kufijve të sigurtë dhe dëbimin e atyre që përbëjnë një kërcënim për sigurinë kombëtare.
Sipas informacionit të NBC, një operacion i tillë do të ishte një sfidë logjistike dhe financiare e madhe, duke kërkuar bashkëpunimin e disa agjencive federale, përfshirë Departamentin e Drejtësisë dhe Pentagonin.
Trump e lidh këtë prioritet me mbështetjen që mori gjatë fushatës, përfshirë nga komuniteti latino, për të cilin ai tha se dëshiron kufij të sigurtë, por gjithashtu dëshiron që ata që vijnë në SHBA të bëhen pjesë e shoqërisë ligjërisht dhe me respekt për vendin. Ai gjithashtu e theksoi se kishte arritur të tërhiqte mbështetje të madhe nga votuesit latino, të rinjtë, gratë dhe votuesit aziatikë-amerikanë, duke theksuar se demokratët nuk janë më në përputhje me mendimin e shumicës së amerikanëve.
Në intervistë, Trump foli gjithashtu për telefonatat që ka pasur pas zgjedhjeve me Kamala Harris, Joe Biden dhe liderë botërorë, përfshirë kryeministrin izraelit Benjamin Netanyahu dhe presidentin e Ukrainës Volodymyr Zelenskyy. Sidoqoftë, ai pranoi se ende nuk ka biseduar me Vladimir Putin, por beson se do të flasin së shpejti.
Përfundimisht, Trump e përsëriti angazhimin për të negociuar një marrëveshje përfundimtare për luftën e Ukrainës nëse ai do të jetë president, një premtim që bëri gjatë fushatës, duke thënë se do të përpiqej të mbyllte luftën me një marrëveshje që është e mirë për të dyja palët.
