Mediat shtetërore libaneze njoftuan se të paktën dy persona janë plagosur nga forcat izraelite në Libanin jugor. Ushtria izraelite tha se kishte qëlluar drejt njerëzve që përpiqeshin të ktheheshin në zona të caktuara të enjten, në ditën e dytë të armëpushimit me grupin militant Hezbollah.
Ushtria izraelite thotë se avionët e saj ushtarakë kryen sulmet në pjesën jugore të Libanit pasi kanë parë aktivitet të grupit militant Hezbollah pranë një depoje raketash.
Izraeli thotë se ata po e shkelnin marrëveshjen e armëpushimit.
Marrëveshja, e ndërmjetësuar nga Shtetet e Bashkuara dhe Franca, përfshin një armëpushim fillestar dy-mujor, në të cilin militantët e Hezbollahut do të tërhiqen në veri të lumit Litani dhe forcat izraelite do të kthehen në anën e tyre të kufirit.
Zona ku do të krijohet një distancë midis forcave ushtarake të të dyja palëve do të patrullohet nga trupat libaneze dhe paqeruajtësit e OKB-së. Marrëveshja i jep fund gati 14 muajve luftimesh të lidhura me luftën në Rripin e Gazës e cila vazhdon ende.
