Në 2 dhjetor, Bashkia e Tiranës ndezi dritat e Pemës së Festave në Sheshin Skënderbej, duke shpërndarë atmosferën festive në kryeqytet. Kryebashkiaku Erjon Veliaj, i shoqëruar nga qytetarët dhe fëmijët, mori pjesë në ceremoninë festive, ku uroi shqiptarët për festat e fundvitit.
Veliaj theksoi se me ndezjen e dritave të festave, çdo person duhet të ndezë gjithashtu “dritën e zemrës”. Ai shtoi: Gëzuar festat! Sjellshin mbarësi dhe mirësi në të gjithë familjet tuaja. Ju dua shumë! Të rrojë Tirana dhe të rrojë e gjithë Shqipëria.
Për herë të parë, në qendër të Tiranës ishin katër pemë Krishtlindjesh, të cilat ndezën dritat e tyre në të njëjtën kohë. Ceremonia u pasua nga një koncert festiv me pjesëmarrjen e fëmijëve. Po ashtu, u njoftua edhe për koncertin falas të ‘Natës së Bardhë’ që do të mbahet në Tiranë.
