Qeveria ka vendosur shpërndarjen e bonusit të pranverës për pensionistët, duke përcaktuar se pensionistët me pensione nën 20,000 lekë do të përfitojnë 10,000 lekë, ndërsa ata mbi këtë shumën do të marrin 5,000 lekë. Për këtë qëllim, do të krijohet një llogari speciale në Bankën e Shqipërisë, ku do të transferohet një fond prej 6.3 miliardë lekësh.
Përveç bonusit të pensionistëve, do të shpërndahen 2.2 miliardë lekë për kategoritë sociale më vulnerabël, si dhe një bonus prej 15,000 lekësh për familjet që marrin Ndihmë Ekonomike dhe Personat me Aftësi të Kufizuara. Po ashtu, një fond shtesë prej 1.4 miliardë lekësh do të alokohet për bujqësinë dhe 1.6 miliardë lekë për bashkitë, për shlyerjen e detyrimeve të prapambetura dhe përmirësimin e shërbimeve publike.
