Në një proces të zhvilluar më 19 dhjetor 2024, gjykata penale e Clermont ka dënuar shtatë persona të përfshirë në një rrjet të trafikut të heroinës që operonte ndërmjet Francës dhe Shqipërisë. Florjan Botinaj, një shtetas shqiptar 30-vjeçar, u dënua me 5 vjet burg si kreu i këtij grupi kriminal.
Hetimet, të cilat nisën në prill të vitit 2022 pas informacioneve anonime, zbuluan se rrjeti i trafikut përfshinte zona të ndryshme në Francë, përfshirë Clermont-Ferrand, Lyon dhe rajonin e Vichy. Gjatë hetimeve të dy viteve, policia identifikoi disa individë, përfshirë rishitës, transportues dhe ndërmjetës, të cilët ishin përgjegjës për transfertat e parave ndërmjet Shqipërisë dhe Francës.
Në gjykatë, Florjan Botinaj mohoi çdo akuzë dhe kërkoi që gjyqtarët të shqyrtonin më thellë rastin. Megjithatë, hetimet dhe përgjimet telefonike e paraqitën atë si udhëheqësin e organizatës, e cila ishte përgjegjëse për trafikimin e heroinës nga Shqipëria në Francë. Po ashtu, hetuesit zbuluan se rrjeti përdorte metoda të sofistikuara për dërgimin e parave dhe lidhjet me individë të dyshuar në Shqipëri.
