Një qytetar katalanas, i arrestuar në Shqipëri për konsumimin e një cigareje CBD, ka përjetuar një kalvar të gjatë dhe të padrejtë në duar të një sistemi gjyqësor të korruptuar. I riu, i cili ishte ndaluar nga policia në Tiranë, kishte blerë një cigare CBD të ligjshme në Spanjë, por autoritetet shqiptare e trajtuan si një vepër penale. Pavarësisht provave që e vërtetonin pafajësinë e tij, ai u detyrua të qëndronte në paraburgim dhe përballë kërkesave për ryshfet nga avokati i tij dhe prokurori, që kërkoi 3000 euro për të shtyrë çështjen.
Në fund, duke u lodhur nga vonesat dhe pasiguritë e sistemit, ai vendosi të arratisej nga Shqipëria dhe të kalonte në Malin e Zi për të arritur në Barcelonë, ku mund të kalonte Krishtlindjet me familjen. Sipas tij, megjithëse provat e ekspertizave dhe dokumentet e blerjes vërtetonin ligjshmërinë e cigareve CBD, prokurori refuzoi ta lironte dhe kërkoi më shumë para, duke e shtyrë atë në rrugën e arratisjes./Cronica Global/
