Sekuestrohen në hyrje të vendit, konkretisht në pikën e Muriqanit 3.430 kg kokainë dhe mallra të kontrabanduara. Arrestohet drejtuesi i furgonit Adriatik Rrasa 32 vjeç. Kokainën e zbuloi qeni gjatë kontrollit.
“Gjatë operacionit u kap në flagrancë dhe u arrestua Adriatik Rrasa 32 vjeç, banues në Lushnjë. Nga kontrolli i kryer në furgonin që drejtonte 32-vjeçari, në hyrje të Shqipërisë, u gjetën 3.430 kg Kokainë, e ndarë në 3 pako. Gjithashtu, u gjetën 60 shishe me pije alkoolike dhe 1 televizor, që dyshohet se janë të kontrabanduara, pasi nuk ishin të pajisura me fatura blerjeje.
Lënda narkotike, mallrat, automjeti i të arrestuarit dhe 2 celularë të tij u sekuestruan nga Policia, në cilësinë e provës materiale” njofton policia. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
