Një ngjarje tragjike ka ndodhur në Cetinje të Malit të Zi, ku një përleshje banale ka çuar në një masakër, duke shkaktuar vdekjen e shtatë personave dhe plagosjen e katër të tjerëve.
Ngjarja ka ndodhur në një tavernë dhe ka përfshirë përdorimin e armës së zjarrit, ndërkohë që autori, Aco Martinoviq, është shpallur në kërkim.
Presidenti i Malit të Zi, Jakov Milatovic, ka reaguar përmes një deklarate të trishtuar, duke shprehur ngushëllimet për viktimat.
‘Në vend të gëzimit festiv, trishtimi për humbjen e jetëve të pafajshme varej mbi Kryeqytetin tonë dhe gjithë Malin e Zi. Jam i shtangur dhe i tronditur nga kjo tragjedi që ka mbështjellë në të zezë Cetinjen tonë, familjarët dhe miqtë e viktimave, të cilëve u shpreh ngushëllimet e mia të sinqerta. Lusim dhe shpresojmë për shërimin e të gjithë të plagosurve. Mendimet tona sonte janë me familjet që humbën më të dashurit e tyre dhe qytetarët e Cetinjës. I gjithë Mali i Zi ndjen dhe ndan dhimbjen tuaj.’
