Në Gjermani, pesë persona humbën jetën dhe një oficer policie u plagos rëndë si pasojë e aksidenteve që lidhen me përdorimin e fishekzjarreve gjatë festimeve të Vitit të Ri.
Policia raportoi se një numër i madh incidentesh ndodhën nga përdorimi i fishekzjarreve, duke përfshirë disa viktima që humbën jetën nga shpërthimi i raketave dhe bombave piroteknike të fuqishme. Një 24-vjeçar në Paderborn dhe një 45-vjeçar në Oschatz vdiqën nga lëndime të shkaktuara nga fishekzjarre, ndërsa një 50-vjeçar në Hartha humbi jetën gjithashtu nga një shpërthim piroteknik.
Rreth 330 persona u arrestuan në Berlin gjatë natës së ndërrimit të viteve, por nuk u raportuan dhuna apo incidente të mëdha. Megjithatë, përdorimi i fishekzjarreve të fuqishme mbetet një çështje debati në Gjermani për shkak të lëndimeve, ndotjes dhe zhurmës që ato shkaktojnë çdo vit.
