Asambleja Parlamentare e NATO-s ka paralajmëruar për rreziqe të shumta në Kosovë dhe Bosnjë-Hercegovinë, duke i bërë thirrje Bashkimit Evropian dhe NATO-s të intensifikojnë angazhimin e tyre në rajon. Mungesa e normalizimit të marrëdhënieve mes Kosovës dhe Serbisë është theksuar si çështja më sfiduese, duke penguar integrimin euroatlantik të të dyja vendeve dhe duke kontribuar në pasiguri rajonale.
Raporti nënvizon se incidentet e dhunshme në veri të Kosovës janë një alarm për seriozitetin e këtyre sfidave. Kosova dhe Bosnjë-Hercegovina janë konsideruar si vende me potencial të lartë për dhunë, për shkak të tensioneve ndëretnike dhe mosmarrëveshjeve politike, sidomos lidhur me Serbinë.
“Prania e forcave të NATO-s në Kosovë mund të përforcohet akoma duke pasur parasysh zhvillimin e ngjarjeve në terren e rajon: Aleatët dhe BE-ja mund të punojnë së bashku për të siguruar forca më të përshtatshme për qëllimet e tyre në Kosovë dhe Bosnjë-Hercegovinë. Vëmendja e aleatëve ndaj Kosovës nuk mund të injorohet – prioritet kanë potencialisht më shumë forca, të pozicionuara siç duhet. Operimi i KFOR-it ka një rol të rëndësishëm, që shtrihet përtej frenimit të dhunës, pasi shërben gjithashtu si një kanal për kontakt pozitiv dhe ndërtim besimi me të gjitha komunitetet në Kosovë dhe Serbi”, shkruan në raport.
